Skip to content

سامسونج يتحرشون

من كثر ما الناس الحين مهتمه في الموبايلات و جديدها،صارت شركات الموبايلات الحين يقدمون دعايات “تطفر” أو “تحرش” بمعنى إن الشركة ماتعرض جهازها الجديد على طول، لا، تسوي حركات و تنزل دعايات الجهاز مايبين فيها أو يطلع نصه و نص مايطلع و حركات من هالنوع، عشان يخلون الناس متلهفه و متابعه أخبارها. فن التسويق و إستراتيجياته أصبحت أكثر تعقيدا مع زياده تعقيد الموبايلات، أنا شنو قلت!!! جني تعقدت؟

Advertisements

البقاء لله يا أتش بي

زبدة الموضوع إن HP صاحبة الجهاز اللوحي ذونظام الوب المعروف ببالم سحبت جميع المنتجات الي شغاله على نظام الوب و منها HP Toouch Pad الحين إذا تبي تعرف أكثر كمل معاي، من ٦ أسابيع نزل الجهاز المرحوم عفوا المذكور، لكن للأسف كان مكتوب عليه الفشل من قبل لا ينزل للأسباب الآتية:

  • الدنيا راحت بأهلها مع الآيباد و الأندرويد و هذول توهم ينزول جهازهم أو ولا شركة ثانية غيرهم عندها نفس النظام.
  • لا توجد برامج تدعم النظام.
  • الجهاز نفسه صناعته سيئة.
  • الجهاز نزل في وقت وايد متأخر… قلت هذا أول شيئ صح!
  • التوقيت كان متأخر يا حبايبي… لا لا لحظه قاعد أعيد نفس الكلام (بس وظحت النقطه)
  • إي والسعر كان غالي.

المهم الإسبوع إلي فات تقريبا HP قررت إنها تقلل سعر الجهاز ٢٠٠ دولار بس هم محد شراه و المدير المسؤول عن النظام إلي كان يشتغل سابقا في أبل فشل و هدهم و طلع و حووووووسه.

الصراحة الحين السوق و المنافسه وايد قوية بين الآيباد و الأندرويد و الدليل إن شركة أبل قامت تدور الزلة و ترفع قضايا مفتراه على الشركات لمنعهم من بيع أجهزتهم الأندرويد مثل إلي حصل مع سامسونج و موتورولا و مافي أي مجال إن شركة أو نظام جديد يدخل المنافسة معاهم الحين لكن الدور على مايكروسوفت لما تطرح نظامها الجديد على الأجهزه اللوحية، بس من إلي شفناه مع الوندوز موبايل و شلون ما مشى أتوقع راح يصير نفس الشيئ معاهم مره ثانية إلا إذا صارت معجزه.

نوكيا و مايكروسوفت “يطلب من الحافي نعال”

نوكيا متوهقة و على شفا حفرة و تفلس بس هذا مو معناه إنها تتعلق في مايكروسوفت لهالدرجة، في السابق نوكياا كانت خايفه من جوجل و الحين جوجل شروا موتورولا قامت تطقق زياده بعد و حاسه إن جوجل راح تحتكر الأندرويد لها و تبعص الباجي و لذلك نوكيا إستثمرت الكثير مع مايكروسوفت لدرجة إنها راح تقمت موبايلاتها إلي لها أمل بالنجاح مثل ال N9 و تنتج موبايلات تشتغل على الويندوز! نوكيا و وندوز!!! إذا مايكروسوفت بروحهم متوهقين و موقادرين ينجحون الموبايلات الي شغاله على الوندوز تتوقعون نوكيا تنجحهم! على قولة المثل “يطلب من الحافي نعال” و للعلم إني جربت موبايل وندوز ٧ الصراحة إنه ممتاز بس وصل متأخر شوي وهذي قصة ثانية لوقت ثاني، الحين نوكيا بابا مايخالف تظنين إن مايكرسوفت عندهم فلوس و يمكن يتزوجونك عفوا يشترونك و يطلعونك من الورطه بس والله شكلكم رايحين في طريق التهلكه و إنتي يا مايكروسوفت مالقيتوا غير نوكيا شتوبون  فيهم و في حقوق الإختراع إلي عندهم لو فيهم خير جان طلعوا نفسهم، أنا أقول حطوا فلوسك في إستثمار البرامج حق أنظمتكم و طلعو خدمات فريده من نوعها للمستخدمين و شوفو الناس شلون تييكم. صج صراع الشركات يخليهم مايشوفون عدل. ملاحظة لأخوي بل جيتس: إذا تبي تنجح دزلي إيميل و أنا أظبطك 🙂

هبت الهواتف الحصرية

image

شنو سالفة هبت الموبايلات الحصرية! و ليش الحين؟ انا كنت اعيب على السوق الامريكي بس الظاهر بعد سنة راح تتقسم كيكة الموبايلات بين الشركات مثل أمريكا و اذا تبي جهاز معين لازم من الشركه الفلانيه يعني يا راح يصير عندك 3 خطوط يا كل ما بغيت موبايل تروح تغير خطك للشركه الحصريه. المهم الحين تقدر تحجز البولد الجديد من الوطنية “حصريا” عسا بعد ما يهبون بقفل الموبايلات #أووووش

جالاكسي تاب ١٠.١ ب ٢٠٥ دنانير

لحق على الجالاكسي تاب عند يوريكا قبل لا أبل ترفع قضية و توقف بيعه بالكويت ههههه أقول بالمشمش، بس جد الحين متوفر عندهم و يقولون ليوم واحد فقط ينباع ب ٢٠٥ مع إكستيرنال ٥٠٠ جي بي، إلي يشوف الإعلان عندي ويشتري التاب يعطيني الإكستيرنال لو سمحتوا P:

كتالوج جوجل الجديد بس للآيباد!

من أول وهله تقول ليش قوقل تنزل برنامجها للآيباد دون أجهزتها الآندرويدية صح؟ بس أنا أقولكم شيئ أو شيئ غريبه إن محد فكر يسوي هالبرنامج من قبل، حلو و أتوقع الكثير من الشركات راح تستخدمه و من هالمنطلق في إعتقادي و هو إن الشركات التجارية عامة مهتمه في الآيباد و عدد مستخدمينه أكثر من الأندرويد، فإصدار النسخة للآيباد قبل الأندرويد هي لسحب رجل المستثمرين إلى البرناج و إستخدام الآيباد كوسيط ثم طرحه بسخة الأندرويد و يكون كل شيئ جاهز فالشركة المستثمرة ما راح تخسر شيئ لما تكون عارضه كتالوجها في الآيباد و تعرضه بعدين في الأندرويد أما إذا صار العكس ما أتوقع راح تنجذب الشركات لبرنامج كتالوجات على الأندرويد  و بعد ما تتكون الفكرة الأولى عندهم إن هذا برنامج للأندرويد و نزل للآيباد تكون راحت عليه.

جوجل أعتقد إنكم شياطييييين.

الغانم أكس سايت و أرخص أسعار في العالم للآيباد و الآيفون